رتبت لهاي الرحله من شهور طويله بديتها أول شي في الفنادق مابتصدقون لو قلتلكم اني حجزت الفنادق قبل سفرنا بسنه تقريبا

لأنه الوقت اللي قررنا نسافر فيه يعتبر موسم وممكن مانحصل الاسعار والفنادق اللي نباها وحجزت وقتها في الهليتون طوكيو اللي في شينجكو Hilton Tokyo Hotel وهيلتون طوكيو باي القريب من مدن الالعاب Hilton Tokyo Bay وفي بيست ويسترن شينجكو

الطيران :

ساعات الطيران من دبي لمطار هانيدا 9.45 ساعات في العوده من مطار هانيدا الى دبي 11.15 ساعه اخترت مطار هانيدا لأنه هو الاقرب ع فندقنا ولأنه هو اللي حصلت فيه كرسي ع البزنس .

المواصلات :

اعتمدنا هناك أكثر شي ع الاندرجراوند والقطارات والباص أما التاكسي يمكن مرتين بس استخدمناه كان وايد غالي أفضل تاخذون وحده من هالبطاقتين حق استخدام المترو والقطار والباص وتتعبى متى مافضت  .

الاتصالات :

الصراحه هالموضوع مافهمته لا في كوريا ولا في اليابان

لما وصلنا  المطار سألنا محل للاتصالات اسمه Mobile Communication Service Counter

سألنا عن بطاقات السيم كارت حق آي فوناتنا بس قالوا انه السيم كارت مانقدر نستخدمه لاتصالاتنا انما فقط لخدمة الداتا

واذا نبا الاتصالات لازم نأجر تلفونات من عندهم .

العمله :

عملتهم تسمى الين و1000 ين تعادل 30 درهم تقريبا

الكهرباء :

في البدايه كنت متوتره عسب هالموضوع لأنه الفولت عندهم 100 ونحن اجهزتنا 220 – 240

ولكن الحمدالله بالنسبه لجراجات الفون كانت الامور طيبه بس للجدر الكهربائي واجهتني مشكله عقب بخبركم عنها وقبل لا أسافر اشتريت محولين اظن اسمه دابتر اللي يحول الكهرباء من 220 الى 100 واول ما استعملته حرقته زين ماحرقت جدري والسبب اني ركبته بالغلط

بالنسبه للبلكات المطلوب أكثر في فيشاتهم هو بلك بو راسين

الأكل :

يعتبر مشكله وممشكله

أول شي لأنها بلد ديانتها البوذيه فمايجوز ناكل من لحومهم وديايهم بس الحلو في اليابان انه فيها الكثير من المطاعم المتنوعه والكافيهات في كل مكان وممكن تختارون بعض الاطعمه المناسبه بالاضافه لوجود مطاعم حلال متنوعه ومنتشره في مناطق معينه .

اللغه :
طبعا هم لغتهم اليابانيه ولكن تفاجأت انه الكثير يتكلمون الانجليزي ولو مايعرفون الانجليزي بعد يساعدون

المرشد السياحي وشركات السياحه :

في اليابان ممكن تتفسحون فيها وتتعرفون عليها بعدة طرق باعتمادكم ع نفسكم والفندق بيساعدكم كيف توصلون لأي وجهه وممكن عن طريق شركات السياحه واللي يكون لها برامج معينه وممكن تحجزون منهم قبل سفركم أو عن طريق فندقكم وعادة تكون هاي الشركات أسعارها مكلفه خصوصا اذا عائله لأنهم يحاسبونكم ع كل الشخص فالاجمالي بيكون غالي وأخيرا ممكن يكون عن طريق مرشد سياحي وهذا صعب تحصلونه وماأدري اذا أصلا متوفر ولكن أنا حصلت مرشده سياحيه يابانيه رائعه وايد فادتنا واستوت صديقتنا