في شركه سفريات بالكويت معروفه بتنظيم رحلاتها حق بلغاريا ، اسمها (سفريات الدبوس) ، و اعم مختصين بالسفر حق بلغاريا ، رحت على يوم عشان اسال عن الطيران و السكن ، قبل لا ادش المحل و قريت حاطين اعلان ( سافر الى فارنا لمده اسبوع ب ـ ٢٧٥ ـ دينار) ، انه قلت حلو ، سعرهم حلو و رخيص ، المهم دشيت المحل ولا في اثنين ، واحد مصري اسمه احمد و واحد بلغاري (مادري شسمه) ، المهم سالته عن الفندق ، قال اذا تبي تروح نفس الباكيج اللي بالاعلان ، السكن بفندق ٣ نجوم ، شفت الفندق بصراحه ما يازلي ، قلتله شنو في خيارات ثانيه ، قال احنا نتعامل مع ٣ فنادق ، واحد ٣ نجوم و واحد ٤ نجوم و واحد ٥ نجوم .
و هذي اسعار كل فندق مه تذكره الطيران لمده اسبوع :
التذكره + فندق ٣ نجوم = ٢٧٥ دينار
التذكره + فندق ٤ نجوم = ٣٨٠ دينار
التذكره + فندق ٥ نجوم = ٤٥٠ دينار
::
طبعا بعد ما شفت الفنادق و اماكنهم و مميزاتهم ، حجزت انه و صاحبي فندق ٥ نجوم اسمه (ادميرال) ، لان كان عالبحر على طول و بنص مدينه فارنا  ، المهم خذا اسامينا و قال يبي صوره الجواز عشان يطلع الفيزا و مبلغ ٣٠ دينار سعر استخراج الفيزا ، و اجراءات الفيزا ما تطول ، ٣ ايام و طلعت الفيزا طبعا ، تذكره السفر كانت على الطيران البلغاري .
حاولنا نخلي سفرتنا ٤ ايام بفارنا و ٣ ايان بصني بيتش ، بس ما صار ، لان اقل شي اسبوع عشان يتاكد حجز الفندق :4: ، قلنا مو مشكله لان فارنا ما تبعد عن صني بيتش الا ساعه و نص بالسياره ، فكل يوم نقدر نروحلها ، المهم حجزنا التذكره و كانت الروحله تاريخ ١٥-٧- و العوده تاريخ ٢١-٧- .

و حق اللي يبي يسال او يحجز ، هذا رقم المكتب :
٢٢٤١٦٤٦٧ ، ٢٢٤١٦٤٧٤ ، ٢٢٤٥٧٦٠٦
بريدهم الالكتروني :
[email protected]

ا يوم السفره ، كانت الرحله الساعه ١٢،٥ الفجر بتوقيت الكويت على الخطوط البلغاريه ، طبعا نصيحه ، اذا احد بيروح على نفس الرحله و نفس المكتب ، يروح مبجر المطار لان راح يكون زححححمه :4: ، المهم بعد ما خلصنا اجراءات المطار و حطينا جناطنا و اخذنا البوردينق ، قعدنا شوي علي ما ايي وقت الطياره ، الحمدلله الطياره ما تآخرت ، الساعه ١٢،٥ بالوقت طرنا  ، مده الرحله كانت ٣ ساعات و نص لي مطار فارنا ، وصلنا المطار اللي كان بسيط و صغير ، و اجراءات المطار ما طولت ، كل شي بسرعه صار ، و بعد ما اخذنا جناطنا و طلعنا من البوابه كان في ٣ اشخاص تابعين المكتب ناطرينا يرحبون فينا ، نطرنا شوي على ما كلنا نتجمع لان كان في باص راح يوصلنا لي الفندق ، و وقت الوصول كان الفجر بتوقيت فارنا ، يعني اول ما طلعنا من المطار الدنيا ظلمه ، بس و احنا رايحين الفندق طلعت الشمس ، المهم الطريج من المطار لي الفندق تقريبا ٤٠ دقيقه ، و ما راح تمل من الطريج ، لان كل جبال و مناظر طبيعيه حلوه ، طبعا كل الفنادق اللي يقدمها (شركه الدبوس) تكون بمنتجع (golden sands) (الرمال الذهبيه) و هذا طبعا منتجع كبييييير في اكثر من ٣٠ فندق و اغلبهم على البحر ، و هالمنتجع ما يفتح الا ٣ اشهر بالسنه ، و باجي السنه يكون مصكر و مافي احد فيه لان كل ثلوج مغطيه المكان  ، و مثل ما انتو عارفين بلغاريا دوله مافيا :4: ، فكنا خايفين من هالشي ، بس لا تخافون ، المنتجع فيه حمايه كبيره و مو اي احد يدشه ، و كل مكان راح تلاقي شرطه ، يعني الوضع امااااان ، و الشعب البلغاري ياخذ و يعطي وياك ، يعني مو ناشفين ، بس مشكلتهم ما يعرفون انجليزي الا نادرا :114: ، المهم ادري طولت شوي ، بس حبيت اطمنكم على الامن هناك ، طبعا وصلنا الفندق و مندوبين المكتب السياحي ويانا و اهم سوولنا جيك ان و عطونا مفتاح غرفتنا ، موقع الفندق حييييل حلو ، بمركز المنتجع و كل شي حوالينك

طبعا هذا الشاطيء مال الفندق ، كل تلقا ناس يبيعون فواكه و عصاير ، و ناس يعرضون عليكم بعض المنتجات الرخيصه ، اقلام و كتب و مجلات و سوارات ، و كل جم متر تلقا محلات مساج
المهم صعدنا الغرفه ، و شفناها ، و كانت اطلالتها عالبحر ، و هذا منظر الغرفه

::
بعد ما حطينا اغراضنا و جناطنا و لويتنا ، قلنا خل نروح ننزل البحر ، نشوفه و نتفحص المنطقه حوالينا و نشتري شويه اغراض ، ماي ، حلاو ، بفك ، بسكوت 
هذي صوره للبحر و زحمته

::
طبعا بعد ما ردينا الفندق ، قلنا خل نفتر بالفندق نشوف شنو فيه و شنو ما فيه و و كنا ناطرين الساعه ١٠ الصبح تصير عشان المندوب مال المكتب يايلنا و بيعطينا جدول رحلات و اسعار و افضل اماكن الصرف ، المهم ، قلنا خل نفتر بالفندق على ما يوصل المندوب
و طبعا شفنا طاولات بريالدو و في ٣ كوفي شوبات بالفندق و حمام سباحه كبير
هني بو صلوح طايحله بريالدو بالفندق

::
و قلت دام ما وصل المندوب، خل اطلع اصور المنطقه حوالين الفندق ، طلعت وياي هالصوره

::
المهم وصل المندوب
و قالنا بخصوص الصرف و حطو باااالكم تصرفون بالمحلات الصرافه الصغيره بالشوراع (كل ما تمشي راح تلقا كشك صرافه ، وااايد في) يقول ان هذيل في منهم نصابين ، يعطونك الفلوس و يحطولك جم ورقه فلوس مزوره بينهم  ، قال روحو اي بنك او بالفندق ، صج شوي اغلا ، بس اامن لكم ، و صج الفرق مو واير كبير (فندق ادميرال في بنك و في صرافه بالفندق)
و بعدها قام يقولنا شنو في رحلات نقدر نروحلها بفارنا و راح اذكرلكم الرحلات و شويه معلومات عنها و الاسعار
ـ رحله الريف البغاري الفلكلوري ، يوم كامل ، سعر الرحله ٣٥ يورو (رحله لتعرف عادات و تقاليد بلغاريا و حياه اهل القرى البلغاريه ، و تذوق و تشتري العسل البلغاري الشهير و تروح نهر كامشيا و تركب القارب بالنهر)
ـ رحله جزيره نيسيبر الاثريه ، يوم كامل ، سعر الرحله ٣٥ يورو (رؤيه المناطق الخلابه بالجزيره ، ، زياره المناطق الاثريه فيها ، و شراء الهدايا التذكاريه ، و القيام بنزهه باليخت حول الجزيره)
ـ رحله حفله عشاء وسط الغابه ، نصف يوم ، سعر الرحله ٣٠ يورو ( الذهاب للغابه و رؤيه عروض رقص الباليه ، رقص فلكلوري، رقص على الجمر ، و تناول عشان مميز وسط الغابه)
ـ رحله السفاري ، نصف يوم ، سعر الرحله ٣٥ يورو (ركوب الجيب الروسي المكشوف ، و القيام برحله وسط الغابه ، ثم تناول الغداء باحدى القرى بجانب الغابه)
طبعا شويه رحلات اللي اكر معلومات عنها ، و في رحلات وااايد مثل الغوص و رحله حداق و الشوي على اليخت وووو الخ .
::
المهم بعد ما عطانا احمد (اسم المندوب) كل المعلومات اللي نحتاجها ، و توكل على الله ، قلنا يالله ، قل نروح البحر نتسبح و نتشمس ، رحلنا الغرفه لبسنا لبس السباحه و نزلنا البحر
و هني الصوره عالبحر قبل لا نتسبح ، الناظره كنت تووني شاريها من وحده تبيع نظارات عالبحر ، لان نسيت نظارتي بالفندق
::
و بعد ما خلصنا سباحه قلنا يالله ، دور حمام السباحه ، و قبل لا نروح حمام السباحه ، رحنا شرينا مظارب (يعني لاعبين)  حق حمام السباحه
::

::
و بجذي نكون خلصنا شغل اليوم الاول بفارنا ، نلقاكم بالقسم الثاني من التقرير