قبل السفر لكوريا الجنوبية بحثت عن مواضيع يمكن تفيدني بس ماحصلت معلومات كامله فحبيت انفع الناس لاني ييت وما اعرف شي

وفي ناس في الفندق جزاهم الله خير استفدت منهم ببعض الاشياء  ولله الحمد اسأل اي واحد اماراتي وبيخبرك ماحد بيقصر وياك والله يشفي مرضاهم وجميع مرضي المسلمين

كوريا الجنوبيه تعتبر ثالث دوله في النمو الاقتصادي والمدني  في اسيا وايضا سابع دولة في السياحة الاسيويه

الفيزا من المطار

في الطياره بيوزعون عليكم ثلاث كروت

الاول خلو من الامراض يوم بتطلع من الطياره في جهاز قياس لحراره الجسم

الكرت الثاني اذا كان عندك اغذيه او لحوم مجففه اكتب لا يوجد ادري انكم شالين بس طاف ان شاء الله ما ايوقفونكم

والثالث هو كرت الفيزا خل عندك عنوان الفندق لانك بتكتبه في الورقه الصغيره

سول او سيول

الاجانب ايسمونها سول والعرب يسمونها سيول عدد سكانها حوالي 10مليون وهي سابع مدينه في التطور المدني بعد دبي طوكيو وهونكونج وسنغفوره شنغهاي بانكوك

عملتهم الوان

عشان اتريح عمرك الوان نفس الدولار تقريبا 3.6 الدولار الوان 3.4 تقريبا لانه ينزل ويرتفع

الحياه في سول نفسها في طوكيو او سنغفوره  غاليه نقدر نسميها اوربا الاسيويه نفس دبي بس دبي فيها اماكن رخيصه واماكن غاليه

 السكن في سول

الفندق

تجمع الاماراتين في فندقين تقريبا. فبيان 1 وفريزر الفندقين عدال بعض انا سكنت في فبيان شقه من ثلاث غرف نوم ومطبخ وصاله واسعه وحمامين كرمتوا الحمامات مافيهن شطاف الي ينمسك باليد بس عندهم شطاف ثاني

حمام

الشقه فيها ثلاجة كبيره جدور كل عدة الطبخ موجوده وفي غسالة ملابس وكوايه وتلفزيون مقتصر على بعض القنوات دبي وابوظبي والشارقة

وانت في الفندق بتحصل العيال طالعين نازلين تحس في جو اماراتي جميل في المكان والسفاره ماقصرت مستاجره شقه في الطابق الثامن ومحولينه مجلس للريال وفيه كوفي ومخبز تحت العماره

مشكله الحياه في سول الاكل الحلال  في مطعم في الفندق حلال وفي كم واحد ايسوي شوارما حول الفندق يعني يمشي حالك كم يوم بس بعدين بتمل وسعرهم غالي يعني الشوارما تقريبا على 4000 وان يعني 4 دولار يعني 14 درهم. وجبة العيش والدجاج  45000 يعني 45 دولار 150 درهم  والاكل الكوري مش حلال لانهم لا اهل كتاب مثل اليهود او المسيح الي تقدر تاكل عندهم للضروره

يعني اكلهم حرام ما يجوز تاكل من اكلهم حتي عند الضروره . يعني تطبخ احسن شوفوا كل شي في البلاد موجود عندهم بس غالي يعني علبة الفول 14 درهم افضل اتييب من البلاد اذا عندك وزن زياده مثل

العيش

البهارات

شاهي

حليب ابو قوس

سمن

يعني العده كلها بدون الدياي واللحم

اللحم والدجاج الحلال موجود في الحي العربي الدجاجه حوالي 4500 وان يعني 15 درهم وفي مشكله الخبر اللبناني مش موجود عندهم خبز التوتلا زين لو بتيبون خبز اعربي

الخظار والفواكه موجوده بس غاليه يعني 6 حبات لومي 18درهم  طمام 25البطيخ  70 درهم بس هذا في الصيف ماادري شوا الوضع في الشتاء

وفي شغله بيعطونك كيس واحد بس واذا تبا كيس ثاني تدفع فلوس

وفيه عدال الفندق محلات الخضره بخبركم في الخريطه وين

شارع العرب ( اتيوان )او شارع الاجانب حوالي خمس كيلو من الفندق فيه محلات ومطاعم عربيه او هنديه مثل

مطعم دبي.

مطعم اربسك

مطعم الباشا

وفي مطاعم حلال وايد عدال المسجد الي بنته السعوديه جزاهم الله خير

شارع ايتوان فيه وايد امريكان لان في قاعده عسكريه عداله ايتوان حق البارات الي موجوده في الشارع  يعني الصبح او العصر تعال وخذ حايتك من المحلات العربيه احسن

الملحقيه الطبيه في شارع ايتوان  اذا احتيتلهم في شي

التلفون

روح شارع ايتوان في محلات تلفونات تقدر اطلع بطاقه بس لازم جوازك معاك الان الرقم مسجل باسم الجواز واذا طلعة من كوريا يقطعون التلفون علي طول فلا اتخلوا كل الارقام باسم واحد كل واحد برقمه وركبه في تلفونك مال الامارات بيشتغل عادي يعني ما يحتاج تلفون كوريا شرات ماقريت في في تقرير جديم

العلاج

اذا كنت ياي علي حساب الدوله

المستشفي هو المسؤول عن توصيلك من الفندق لين المستشفي والعكس حتى من المطار هم بيبونك لين الفندق  وهم يحجزولك الفندق بس على حسابك اليوم علي 770درهم

الله يطول عمر الشيوخ والدوله ماقصروا في شي ينزل للمريض في اليوم 250000 حوالي 900 درهم والمرافق 250000 ينزلن في حسابك كل خميس وهم يوم بتوصل بيعطونك فيزا تقدر تسحب في بنك اسمه   shinhan bank لا تسحب الا من هذا البنك احسن ولا تستخدمها في المشتريات او الفندق لانه بيدفعونك اكثر بس تقدر تستخدمها عادي

البنك

المواصلات

التكاسي

في عدة الوان للتكاسي البرتقالي والابيض والرصاصي يفتحون العداد علي 3000وان

والاسود علي 5000 وان

ومتوفره الباصات والقطار او المترو حتى فيه سياكل للاجار يعني كل انواع المواصلات موجوده بس لازم اتعرف المحطه الي تبيها يمكن اغلى شي التكاسي

الكورين يحبون القهوه بشكل غير طبيعي واين ما تروح بحصل كوفيات القهوه اكثر من العصير

البقالات.

عندك 7eleven

وعندك GS25

في بقاله اسمها c4u بتحصلون عندهم الحليب والروب والعصاير والحلاويات بس لا تخذون منهم الوجبات لان فيها لحوم خنزير و ونصيحه اول ماتيون روحوا لوتيه مارات اكبر جمعيه عندهم وخذ الاساسيات الي تباها وقريبه من الفندق وبعد ما تحاسب خذ اغراضك وحطهن في كرتون لانهم مايعطونك اكياس بحصل الناس يحطون في كراتين وحاطيلك لزق ماعليك الا انك تلزق كراتينك وتشلهن لين التكسي الان العربانه ماتطلع برع الجمعيه يعني خفف عشان ما تشل وايد