هكتب كل الخطوات الخاصة بالموضوع عشان الموضوع يبقى سهل على اى حد..

كيفية أستخراج الفيزا لسويسرا :

سويسرا دولة تابعة لأوروبا فبتحتاج شينجين فيزا زيها زى اى دولة اوروبية..اجراءات الفيزا تقريبا متشابهة من بلد لبلد ودة مقال بيشرح أزاى تستخرج فيزا شينجين..

الطيران الى سويسرا:

افضل حاجة لأى شخص مخطط انه يحجز من بدرى عشان الاسعار ويقدر يدخل على skyscanner ويحجز من بدرى عشان يلحق اسعار كويسة..

المواصلات فى سويسرا :

قبل مسافر سويسرا دورت على قرية تكون الطبيعة فيها خلابة ورسيت على iseltwald سويسرا فيها مدينة اسمها Interlaken المدينة فيه قرى تابعة ليها..المكان ده جزء من الجنة ومفيش وصف ليه..حتى الصور مش هتوصف الموضوع اصلا..القرى دى افضلها قرية اسمها iseltwald ليه افضلها..لانها قريبة جدا من المدينة..فاضية وهادية والطبيعة هناك متتوصفش شلالات وبحيرات وموقعها وسط كل النشاطات وقريب من كل القرى التانية وقمم الجبال..

-لما بتنزل مطار زيورخ بتشوف علامة القطار..بتروح شباك التذاكر وتحجز ذهاب بس لقرية iseltwald ب ٧٩ فرانك سويسرى…التذكرة بتوصلك لحد القرية بالظبط..بتركب قطار لمدينة bern ومن هناك بتغير قطار جنبه بيروح interlaken ost بعدين تنزل بتركب باص رقم ١٠٣ بيوصلك القرية بالظبط..الكلام ده كله ساعتين يعنى ولا حاجة..

الفنادق فى سويسرا :

-سويسرا غالية..وانا جربت فى القرية دى فندق وهوستيل..والحقيقة القعدة فى الهوستيل وفرت عليا توفير ميتوصفش…الهوستيل اسمه lake lodge hostel..الفندق ده قدام البحيرة بالظبط…هتحس انك فى البيت…هتتعرف على ناس وهتعيش جو جميل جدا مش هتعيشه فى الفندق..وببساطة هتروح معاك كيسين مكرونة وتونة خلصت انت مش هتصرف مليم فى اكل..كل يوم هتطبخ وتاكل مع الناس وهتعيش احلى جو ومن غير اى حاجة..لو اعتبرنا مخدتش حاجتك…الهوستيل بيبيع كل حاجة للطبخ..كيس مكرونة ب ٣ فرانك هيقضيك ٣ ايام واكتر وخلصت…انت كدة وفرت اكل وشرب وفندق..عشان النشاطات غالية..والفندق بيديك بطاقة مواصلات طول اقامتك مش هتصرف مواصلات من القرية لأنترلاكن

وتقدر تشوف اسعار الفنادق فى سويسرا من خلال النموذج اللى جاى وتقدر كمان تدور من خلالة على افضل الفنادق الموجودة هناك

النشاطات :

-الحقيقة ان المكان ده لو قعدت فيه شهرين هتعمل كل يوم نشاط مش هيخلصوا..يعنى غير الهدوء والجمال انت كمان كمية الرحلات اللى موجودة متتعدش…انا هقول على احلى حاجة تتعمل عشان هى تجربة وبتتعمل مرة..

-النط بالباراشوت paragliding دى حاجة الحقيقة متتوصفش من جمالها وجمال اللى هتشوفو من مناظر والادرينالين…تكلفتها ١٦٠ فرانك..

-حاجة اسمها canyoning grimsel دى ب ١٥٨ فرانك..رحلة نص يوم…عبارة عن جبل بتطلع لفوق وبينزلوك كانيون بين الجبال وميا وحبال وتنط فى ميا وتسلق وحاجة مش محتاجة اى احتراف..يوم مش هتنساه فعلا..

-التجديف بقى وده حاجة جميلة جدا..اصلا البحيرة قدامك ممكن تعوم فيها اى وقت..بس حلاوة التجديف هتطلع انت والناس دايما فيه ناس طالعة..بيتأجر نص يوم ب ١٥ فرانك..بتجدف براحتك وسط الجمال ده كله..وبتلاقى جزيرة فى النص بتنزل فيها وفيها منط بتفضل تنط فى الميا..معاك بقى جرو برو ودنيتك هتعيش احلى جو زى الافلام بالظبط..

-فى قمم جبال كتيرة اوى ورحلات ليها من اجملها Gerindelwald-first دى اصلا قرية ساحرة هتحس انك فى مكان فوتوشوب او فى قرية السنافر..هتروح ب ٥٨ فرانك..هتركب تيليفريك هيطلعك فووق خالص لقمة الجبل وفيه جسر معمول بتمشى عليه لقمة الجبل فوق..حاجة روعة..

-مدينة interlaken نفسها جميلة جدا وممكن تنزلها كل يوم..الهوستيل بيديك كارت باص لطول مدة اقامتك ببلاش يعنى مش هتصرف اى حاجة لحد متمشى فى مواصلات..تاكل ايس كريم تتمشى..المدينة نفسها زحمة ووسط الجبال…

بتحجز طريق عودتك بنفس الطريقة..بس هتدفع ٧٣ فرانك لان الباص انت واخده ببلاش..واضمنلك انك هتكون قضيت احلى اجازة قضيتها فى حياتك كلها ان شاء الله..لان المكان ساحر لدرجة ان كل الجنسيات كانت مبهورة..المكان ينفع هانى موون جدا