يوم الاقلاع من جدة و الوصول الى فيينا

12/06/

طبعا الشنط جاهزة ومقفلة وتم التأكد من كل الامور .. ودعنا الاهل و الاحباب .. اتجهنا الى مطار الملك عبدالعزيز بجدة الساعة 01:45 صباحا .. حيث كان موعد الاقلاع الساعة 4:15 صباحا .. والحمد لله تمت اجراءات الشك ان والبوردينج وتم تختيم الجوازات بكل يسر وسهولة ..  

وصلنا ارض الدوحة الطيبة الساعة 06:15 دقيقة صباحا وتوجهناالى صالة (الرحلات المحولة) وكانت الامور سهالات .. عدينا التفتيش وذهبنا الى صالة الانتظار .. والحمد لله اقلعنا من الدوحة الساعة 08:30 صباحا ..

وصلنا فيينا الساعة 14:15 بتوقيت النمسا .. دخلنا الصالة تم تختيم الجوازات بطريقة سهلة وسلسة جدا .. استلمنا العفش .. وهنا تبدأ المغامرة .

ذهبنا الى شركة سكست لتأجير السيارت .. قابلت الموظفة واعطيتها رقم ورقة الحجز سألتني هل سوف تعيد السيارة الى ميونيخ قلتها نعم .. المهم خلصت الفاتورة طبعا بعد التأكد من (الرخصة الدولية + الرخصة المحلية + جواز السفر + البطاقة الائتمانية) .. وافادتي بأن السيارة (بنزين وليس كما طلبت ديزل) قلت يالله ..

الشئ المفاجئ في الموضوع هو حجز مبلغ (100 يورو) فقط كتأمين وليس كما قرأت في التقارير بأنهم يحجزوا نفس مبلغ الايجار او نصفه ..

المهم اتجهت الى المواقف التي بها السيارة بعد دوران وضياع لمدة 45 دقيقة لان اغلبهم يتحدثون بالالماني وانجليزيتهم ضعيفة نوعا ما .. وللمعلومية هناك نوعان من المواقف في مطار فيينا وهي المواقف الداخلية و المواقف الخارجية .. وانا وام روين نلف و ندور في الداخلية وبعد طول انتظار لقينا شخص في المواقف اعتقد انه من شركة هيرتز .. وريته الورقة وقال هذه المواقف في الساحة الخارجية تخرج من هذا المبنى وتتوجه للخارج ..

خرجت للساحة الخارجية ولقيت رقم الرصيف اللي واقفة فيه المزيونة واذا بالطامة .. في البداية قلنا بنزين ومشيناها اتفاجأ ان حتى السيارة مو نفسها 

رجعت مرة ثانية للمكتب ومعايا زوجتي و بنتي والشنط .. وقلت للموظفة ان هذه السيارة ماهي نفس اللي طلبتها وقالتي هذا المتوفر :105: .. قلت لها اعطيني السوبرفايزر اللي وجات المشرفة الكريمة وشرحت لها السالفة كلها قالت انت راح تسلم السيارة في موينيخ وهذا ضريبته 200 يورو لازم تدفعها .. قلتلها ترا المبلغ مشمول ووريتها الورقة (رسوم تسليم سيارة في دولة اخرى) 212 يورو .. المهم طلع الموضوع كله ان الموظفة الاولى جديدة وماهي فاهمة ان حجزي كان عليه عرض كالتالي:

مبلغ الايجار المفترض يكون 6120 ريال تقريبا .. وانا طلبت اختيار الدفع في نفس وقت الحجز عملو لي خصم تقريبا 900 ريال وصار الاجمالي 5212 ريال .. 

المهم راحت المشرفة وفهمت الموظفة طريقة حجزي وطبعت لي فاتورة جديدة واخذت المفتاح حق السيارة الجديدة ومثل ما طلبت الماكينة (ديزل) والحمد لله وتأكد ان السيارة واقفة في المواقف الداخلية .. والحمد لله وصلت السيارة وكل الامور تمام وكرسي الاطفال موجود مثل ما طلبت .
وروين مع التعب الله يحفظها حطت راسها

حطيت العفش في السيارة بعد التعب هذا كله وكانت الساعة حدود 16:30 بتوقيت النمسا .. ركبت رفيق الدرب (مستر جارمن) شغلت السيارة توجهت الى المخرج الا كرت الخروج من المواقف مو موجود في السارة .:4:. دور يا ولد يمين يسار فوق تحت في الشنطة مافي شي .. وارجع يا ابو روين للمكتب مرة ثانية واقول للموظفة ابغى كرت الخروج من المواقف .. طبعا بكل برود قالت لي (اوه ام سوري .. تيك ات)  قلت في قلبي (هاتي البطاقة الله يرجك)  وارجع للمواقف والحمد لله اخذت السيارة وخرجت من المطار الساعة 16:55 تقريبا .. قلت لصديقي (مستر جارمن) وصلنا للفندق و قالي (ابشر طال عمرك ما طلبت حاجة) ..

الحمد لله وصلنا الفندق قرابة الساعة 05:20 دقيقة .. عملية التشيك ان ما اخذت على بعضها 3 دقائق واعطتنا مفاتيح الغرفة ونزلنا العفش .. ومع تعب هذا اليوم من الفجر الى دخول الفندق والحوسة حق السيارة .. قلنا خلينا ناخذ دش ونرتاح شوي .. 

طبعا تقييمي للفندق مثل ما حطيت 10/10 من ناحية النظافة والخدمة و الفطور المتنوع ..

المهم الغفوة اللي المفروض ناخذها امتدت الى الساعة 10 ليلا .. راح اليوم علينا . قمنا قضينا الصلوات الفائتة .. وقلت الا نخرج ونشوف ايش في برا .. والجو كان امطار قليلة ويميل الى البرودة .. خرجنا وكنت ابغا اروح سوبرماركت (بيلا)الشهير وقلت لصديقي ودينا نبغا نقضي .. رحنا للمحل طبعا مقفل واوقات الدوام من الصباح الى الساعة 7 مساء .. قلت لصاحبي رجعنا على الفندق و امرنا على الله .. 

الكارثة الاولى مع صديق الرحلة (مستر جارمن) .. في الرجعة اعطاني طريق مختصر واظن انه كان زراعي لان النهر على يميني و على يساري اعشاب .. المهم (خذ يمين – خذ يسار – خذ طولي خخخخ امزح) وانا معاه .. والطريق بدأ يخوف اللي واشوف كاتب (بعد 60 متر خذ يسار) وفعلا كان على يساري شارع ..

لفيت وتخيلوا نزلت على ايش ؟؟  نزلت على رصيف كبير وعالي (صبة) وعلقت السيارة في النص .. وام روين صاحت و روين تبكي .. وشوي شوي طاحت مقدمة السيارة على الدرجة الصغيرة اللي بعد هذه الصبة ونزلت السيارة من الدرج وقطعت سكة القطار والحمد لله نزلت على الشارع العام .

رجعت عالفندق وخاااااايف ان يصير شي للسيارة وقفتها وقلت الصباح رباح اذا في شي يخر من تحت السيارة او شي راح ابلغ الشركة ..