هتحتاج الاوراق المطلوبه تكون منها Soft Copy عشان بتعمل Upload ليها و انت بتقدم على التاشيرة و هى كالاتى :-
– صورة شخصية خلفية بيضاء
– صورة الباسبور
– حجز فندق وهمى
– حجز طيران وهمى
– تامين صحى بالمدة اللى هتقضيها هناك
– كشف حساب بنكى لمدة 6 شهور
– وInvitation letter لو فيزا عمل ؛ و HR letter لو فيزا سياحة.
بعد ما تملى كل البيانات على الموقع هتحدد ميعاد فى السفارة و هيطلعلك فى الاخر Application Form الموقع بيعملها اوتوماتيك فيها كل بياناتك هتعملها Download و تاخدها معاك و انت رايح ميعاد السفارة و طبعا معاك كل الاوراق دى Hard Copy
فى السفارة ان شاء الله مش هتاخد اكتر من 15 دقيقة ياخد منك الاوراق و الفلوس ( هى كانت 470 جنيه قبل التعويم دلوقتى ب 60 دولار ) و يقولك تيجى تاخدها كمان 4 أيام بالكتير ان شاء الله .
الفيزا بتطلع لمدة 6 شهور
و ده لينك فيه شرح ازاى تملى البيانات على الموقع :-

اول ما تستلم التأشيرة ان شاء الله ؛ لازم تتطلع التصريح الأمنى من مجمع التحرير
التصريح الامنى بعد ما تاخد التأشيرة ؛ بتروح مجمع التحرير الدور التانى؛عند ظابط الاتصال ؛ بتسحب ورقة بيانات تملاها و اهم حاجة اسم الوالد رباعى و تاريخ ميلاده ؛ و بتقدمها مع صورة الباسبور و التاشيرة ؛ و يقولك تعالى استلمه كمان 3 أو 4 أيام.
نصيحة بلاش تأكد أى حجوزات الا لما تاخد التصريح الأمنى ؛ عشان ممكن تروح تستلمه يقولك مرفوض و على حسب السبب ، بيكون غالبا السبب تشابه أسماء و تضطر تلف لفة حلوة بتاع 20 يوم لحد ما تفك التشابه ده.
و كمان اللينك اللى فوق فى شرح للتصريح الأمنى بالتفصيل.
– رحلتى كانت 7 أيام فى شهر ديسمبر اللى فات حجزت الطيران و الفندق مع شركة سياحة هنا قبل السفر عشان ادفع فلوسهم بالجنيه و اوفر الدولار للرحلة  وكمان حجزت معاهم رحلة لمدينة بورصا و دفعتها بالجنيه 
– فى اسطنبول لو حبيت تتوه مش هتعرف لأن فيها شبكة مواصلات قوية جدا ؛ الترام و المترو كانوا بيوصلنى لأى حتة أنا عايزها و طبعا لازم تستخدم كارت اسطنبول و تشحنه ب 50 ليرة مثلا هيكفيك اسبوع ان شاء الله 
– اهم برامج و Applications ممكن تستخدمها هناك هى Visit A City و Trip Advisor و دليل اسطنبولIstanbul Directory هتساعدك فى تنظيم الرحلة باليوم و مواعيد اللى المتاحف و القصور بتكون فاتحة فيها؛ و كمان اماكن المطاعم و الكافيهات و تروحها ازاى.
– الأكل هناك و همى ؛ خصوصا محلات الاوبن بوفيه و طبعا لازم تجربوا الكمبيرالتركى وتشربوا اللبن و السحلب 
– الحلويات التركية هتفلسك خصوصا الحلقوم التركى و الكنافة على الفحم و البقلاوة 
– اهم المعالم طبعا قصر توب كابى و نصيحة مش لازم جزء الحرملك؛ و جامع السلطان أحمد و متحف آيا صوفيا ؛ قصر دولما بهشة ؛ برج جالاطة ؛ الجراند بازار و السوق المصرى.
– لازم طبعا تروحوا شارع الاستقلال و ميدان تقسيم فى تقسيم ؛ منطقة Laleli و Sirkeci لشراء الهدايا و Eminounu لازم تاكلوا السمك هناك  و كوبرى جالاطة ؛ منطقة Ortakoy و جسر البوسفور.
– رحلة البوسفور ممتعة جدا لازم تاخدوها من ميناء Eminounu ب 12 ليرة.
– الحمام التركى يا جماعة  و اشهر واحد اسمه شمبرلي تاش لدرجة ان محطة ترام متسميه على اسمه وهو غالى شوية بس برده لازم يا جماعة 
– لازم رحلة لمدينة بورصا و طبعا كانت احلى تجربة ليا الوقت ده عشان كان فيه تلج و تزحلق على الجليد على جبل الاولداغ و تركب التليفريك ؛ بجد يوم كامل هناك ممتع و رائع
– بالنسبة لل Shopping فيه مولات كتير جدا اشهرها مول جواهر و مول سفير و مول Olivium و ده ارخص و احسن واحد فيهم بالنسبة للاسعار ده غير محلات شارع الاستقلال كتير جدا  هتفلس برضه 
– بالنسبة للسهر فاكتر منطقة هى تقسيم و خصوصا شارع الاستقلال و انا حجزت الفندق هناك عشان كده 
– اسطنبول بجد مدينة اكتر من رائعة و مش غالية تقريبا تكلفة اسبوع معيشة ومزارات و رحلات حوالى من 1200 ل 1500 ليرة (تقريبا من 350 ل 450 دولار) شاملة كل حاجة 
– الجو هناك كان ساقعة طبعا بس البلد نضيفة فعلا و حتى فى الشتاء ممتعة برضه