اليوم الاول في فانكوفر

قبل ما تطلعون من المطار بدلو الفلوس اللي معكم إلي دولارات كندية ، و إذا كان معكم ريالات سعودية يفضل إنكم تبدلونها و انتم في أوربا .

أول ما تطلعون من المطار منتم لاقين تكاسي قدامكم ، بيصير فيه واحد موجود و على ملابسه كتابه انه مسئول عن التكاسي ، اطلبوا منه التكسي أو إذا بغيتو لموزين طويل ، و قولول له إنكم بتروحون إلي فندق الهيلتون ميترو تاون (Metro town Hilton) ، التكسي تكلفته في حدود 30 دولار كندي ، و مدت المشوار حدود 25 دقيقة إذا ما فيه زحمة.

صورة للفندق.
إنا أتوقع إنكم بتكونون طلعتو من المطار و في طريقكم للفندق حدود الساعة 1600 بتوقيت فانكوفر ، و يكون باقي على غرور الشمس حدود ساعتين إلي ثلاث ، لذلك احرصوا إنكم تتفرجون على الطريق اللي بيمشي فيه التكسي لأنه بيمر جنب بعض الغابات و نهر الفريزر ، و قبل الوصول للفندق بتلاحظون إن التكسي بدا يطلع ما يشبه طريق جبلي ، و السبب هو إن منطقة الفندق فوق هضبه مرتفعة عن باقي برنبي و فانكوفر. و انشاءالله ما يكون الجو ممطر عشان ما يفوتكم ولو جزء بسيط من جمال فانكوفر.

أول ما توصولون للفندق و تستلمون الغرفة حقتكم ، أكيد بتريحون شوي من مشوار الطريق و بتأخذون لكم دش و بتتعرفون على غرفتكم و تتفرجون على المناظر اللي تطل عليها شبابيك غرفتكم.

هذي صوره للغرف

إنا تعمدت اختار لكم هذا الفندق لأنه أولا جديد (تم افتتاحة عام 1998) ، و لأنه يقع في منطقه حلوه و هادية و إستراتيجية ، الفندق جنبه كل شي ممكن يحتاج له الشخص.
الفندق 4 نجوم و يكلف حدود 400 ريال سعودي في اليوم.

بعد ما تريحون لكم حدود 3 ساعات في غرفة الفندق ، أكيد بتكونو جايعين و ودكم تأكلون شي زين.
إنا أرشح لكم مطعم تايلندي اسمة تاي هاوس رويل (Thai House Royale Restaurant ) ، لان أكله جداً لذيذ و لأنه أول مطعم أكلت فيه أول مره زرت فانكوفر عام 1994 ، و ميزت المطعم انه خلف الفندق مباشره على شارع كنقز وي (Kings Way) ولا يأخذ منكم أكثر من 3 دقائق مشي.

رغم إن شهر 5 في فانكوفر هو منتصف فصل الربيع إلا إن الجو يكون في بعض الأحيان شوي بارد ، عشان كذا خذو معكم من ديرتكم جكيت واحد خفيف و يفضل يكون مقاوم للموية عشان المطر.
في المطعم أوصيكم تأخذون كمقبيلات لحم تايلندي مشوي زى الكباب و يجي على عصيان صغيره و يكون معه صحن صغير من زبدت الفول السوداني و المطبوخ بطريقة خاصة كمقدمة للأكل ( ابتايزر) ، بعد كذا اطلبوا لكم شوربة الربيان الحارة التوم يوم قوونق (Tom Yum Goong) ، و إذا تحبون الأكل الحار اطلبوا منهم ما يحطون فيها فلفل.بعد كذا اطلبوا الطبق الرئيسي المفضل عندهم و اللي ما تلقونه عند احد غيرهم و هو طبق مشكل من المأكولات البحرية بالخضار (Seafood platter) ، شي يجنن شي خطير ، طبعاً الأكلة تجي حارة بالفلفل ، بس انتم ممكن تقولون لهم يقللون كمية الفلفل أو ما يحطونه بالمرة. و اطلبوا مع الأكلة اطلبو رز ابيض أو رز مقلي مع الخضار ( فرايد رايس).

و إذا ما تحبون الأكل البحري ، عندهم تشكيله كبيره من الأكلات الثانية.العشاء بيكلف حدود 50 دولار كندي لشخصين.

بعد ما تخلصون من العشاء و تشبعون ارجعوا للفندق و نامو لأنكم أكيد تعبانين من المشوار.

إما إذا فيكم بعد بعض النشاط ، ممكن إنكم تمشون للسوبر ماركت الكبير اللي جنب الفندق و تشوفون إذا انتم محتاجين بعض الإغراض لغرفتكم أو لكم في الفندق ، و اسم السوبر ماركت هو سيف اون فود (Save On Foods).

طبعاً إنا حرصت إنكم تروحون للسوبر ماركت و تشوفونه عشان تشوفون الفرق بينها و بين اللي عندنا في السعودية ، بس يا خوفي معاد تطبون سوبرماركتات السعودية عقب ما تمرون هذي.

قبل ما أنساء ترى السوبر ماركت هذا اللي قلت لكم عليه صغير بالمقارنة بواحد ثاني كبير في مجمع الأسواق اللي جنب الفندق.
طريقة الوصول للسوبرماركت من المطعم التايلندي ، انتم امشوا مع الخط الاصفر و أول شي بتشوفونه هو مطعم الريد روبن       ( Red Robin ) و هو الدائرة الزرقاء في الخريطة ، وجنب المطعم ممر للمشي بعدين يجي محل ستار بكس (المربع الأخضر) و جنب الستاربكس يجي مطعم يوناني صغير يبيع الشاورمة و بعض المشويان و بعده يجي كم محل صغير ، بعدين يجيكم السوبر ماركت ، و جنب السوبر ماركت فيه مطعم الأكلات السريعة اي اند دبليو ( A & W ).

مع العم انه للمطعم التايلندي باب خلفي يطلع مباشرة على مواقف السيارات المقابلة للسوبرماركت.

منقول بتصرف