مخطط الرحلة 

اول شي بحثت عنه رحلات الطيران فكانت الاسعار غالية جدا مع اقتراب موعد مونديال كاس العالم
وطيران الامارتية والقطرية والتركية مسافات الطيران طويلة من 12 الى 14 ساعة وغالية
وسبحان الله يمكن ثالث يوم جاني مدير الخطوط المغربية المكتب فسألت فيه رحلات ع الخطوط المغربية الى البرازيل 
فقال نعم تنزل على ساوباولو 3 رحلات في الاسبوع طبعا بدون تردد طلبت منه تخفيظ للتذاكر ولو اردتها مجانيه لا اخذتها ولكن التذاكر المجانيه
ممكن في العوده لايحصل لي مقعد حتى لو حجزي ok ففي نظام الرحلات من يدفع يطلع فطلبت منه 75% تخفيض وكان لي ذلك واطلع درجه اولى من الرياض
بعد يومين اتصل علي وقال لاتوقف إلا في مكتب الخطوط المغربية عشان اسوي الحجز واقص التذكره وفعلا ذهبت الى مكتب الخطوط المغربية
واعطيته مسار الرحله والتواريخ وقصيت تذكرتي وبدأت في حجز الفنادق والطيران الداخلي للبلدان التي سوف ازورها
——————
مدة الرحلة كانت 30 يوم تقريبا
موزعة 6ايام مابين مراكش واغادير
12يوم البرازيل
2يوم الدار البيضاء(كازبلانكا)
4ايام جنيف والجنوب الفرنسي
2يوم برشلونة
2يوم مدريد
1 يوم كازبلانكا
واخر يوم العوده الى الرياض
—————————————
تاريخ الرحلة 16 مايو

مسار الرحلة على حسب التذكرة
الرياض – كازبلانكا
كازبلانكا – ساوباولو- كازبلانكا
كازبلانكا – جنيف
مدريد – كازبلانكا
كازبلانكا – الرياض
سعر التذكرة 4763ريال
—————————–
الطيران الداخلي في البرازيل
طيران تام TAM
ساوباولو – ريودي جانيرو
ريو دي جانيرو – فوزدي ايغواسو
فوزدي ايغواسو – ساوباولو
سعر التذكرة 291.85 دولار
————-
اوروبا على طيران ايزي جت
جنيف – برشلونة
سعر التذكرة 112.15 فرانك سويسري
———–
في المغرب استاجرت سيارة عن طريق شركة rentalcars
لمدة 6 ايام تقريبا بـ860 ريال مع الضمان التكميلي(التامين)ضد الاصدام واضرار السيارة
———————-

تاشيرة السفر الى البرازيل
الطلبات على هذا الرابطوضعه الاخ ابو غسان(اخر فرصة) ماقصر جزاه الله خير
فيزا البرازيل خطوة بخطوة brazil visa 2014

بعد اكمال الطلبات قدمت طلب التاشيره يوم الاثنين ويوم الاربعاء استلمت جوازي مفيز.. طبعا لي معرفة في سفارة البرازيل وإلا ماخذتها في ثالث يوم
وكالمعتاد من اسبوع الى 10 ايام وتكون جاهزه ..لايوجد زحمة ولا اي تعقيد بس كمل طلبات التاشيره وفي الموعد ستستلم تاشيرتك بدون تاخير
مبلغ التاشيره تدفعه بعد تسليم اوراقك للسفارة يعطيك الموظف نموذج ايداع لحساب السفارة بمبلغ 90 ريال في بنك سامبا وبعد التسديد ترجع للسفارة تسلمهم نموذج الايداع مختم من البنك وعلى الموعد تجي تستلم جوازك
التاشيرة 3 اشهر متعددة الدخول
—————–
تاشيرت الشنقن استخرجتها عن طريق مكتب 
بمبلغ 650 ريال شامل كل شي بما فيها الرسوم والتامين وهم يكملون باقي الطلبات من حجوازت وفنادق وموعد السفارة
وكل ماعليك تسلم لهم الجواز وصور شخصيه وصور بطاقة الفيزا او المستر كارد
سلمت المكتب الجواز وبعد اسبوع بصمت في مكتب التاشيرات الموحد وبعد اسبوع من التبصيم استلمت الجواز والحمد لله اعطوني سنتين عن طريق السفارة السويسرية
——————–
كل الفنادق حجزتها عن طريق BOOKING
وسا احاول ادراج الفنادق والاسعار ضمن التقرير
————–
واخيرا الميزانية بالنسبة لي كانت مفتوحة والحقيقة لم اهتم بما خسرت
او كم ساخسر ولا اعرف كم خسرت بالضبط
ولكن بعد رجوعي حاولت اجمع اللي اقدر علية مع مراجعة كشوفاتي البنكية 
المبلغ تقريبا 35 الف ريال 
وهذا ما خسرته في المغرب والبرازيل فقط 
اما اوروبا فحصل تغيير في مسار الرحله بعد وصولي للبرازيل
وساذكر هذا التغيير في صفحات التقرير

يوم 16-مايو-2014 وعند الساعة العاشرة مساءً ودعت الاهل وخرجت من بيتي متوجهاً للمطار توكلت على الله 
وصلت المطار ونزلت للصاله سحبت البوردنق وشيكت العفش وبعدها توجهت لصالة الفرسان حتى موعد اقلاع الرحلة
وعند الساعة 30-12 دخلنا الطيارة وبعدها بوقت قليل اقلعنا وغادرنا ارض الوطن>>فكة من الحر والغبار
نزلنا مطار القاهرة لمدة 40 دقيقة لم ننزل من الطيارة فقط صعدوا معنا مسافرين واقلعت الطياره بدون تاخير..
وصلت مطار محمد الخامس بسلام 
وكالعادة ماينغص اجواء الوصول إلا موظفين الجوازات والجمارك يطلبون هدية او بالاصح رشوه
او تبدأ المماطله والتاخير عشان ادفع لهم 
وانا حلفت ابن امه ماياخذ درهم لو اجلس يومي كامل في المطار 
موظف الجوازات >الحمد لله على السلامه
انا>الله يسلمك
موظف الجوازات > بدأ يقلب في الجواز وينتظر الهدية
انا انتظر تختيم الجواز واناظر بصمت
موظف الجوازات >انت سعودي
انا> ابتسمت وقلت نعم وفي نفسي اقول وهالجواز الاخضر وماسك فيه ربع ساعه تقلب ومو عارف>>يستهبل شكله
موظف الجوازات >اول مره تجي المغرب
انا> لا مو اول مره 
موظف الجوازات > جاي سياحه
انا>نعم سائح اجل وش هوله جاي اشوف وجهك
موظف الجوازات >كم يوم بتجلس في المغرب ويقلب الجواز ويفتح على صفحة تاشيرة اوروبا ويحك فيها يفكرها مزورة 
انا > لاحووووول اسبوع وبعدين بطلع ع البرازيل وارجع للمغرب مره ثانية وبجلس يومين وبطلع على سويسرا وبمر الجنوب الفرنسي كمان واسبانيا وبرجع لك مره ثالثه 
موظف الجوازات >اووه ماشاء الله 
انا ليش فيه شي ختم لي وراي سفر رايح مراكش
موظف الجوازات > انتم يالسعوديين حبايبنا مافية اكرامية
انا > وش اكرامية مو فاهم عليك مسوي غبي مدري وش السالفه
موظف الجوازات > يبتسم يعني هدية
انا> اووه لا والله ماشريت ماكنت ادري بس المره الجاية ان شاء الله اجيب لك هدية وفي نفسي اقول هدية بعينك والله ريال ماتاخذه لو ارجع ع الطياره
موظف الجوازات >يقلب الجواز ويناظرني وانا حاس فيه يقول ياليئم
موظف الجوازات >بصوت واطي اقصد بخشيش 
انا> اهااااا ياليت بس والله ماصرفت وماعندي كاش عندك شبكة >كنت اشوف نار ودخان طالعه من راسة هههههههههههه ياليئممممممممممممممماكو بخشيش
موظف الجوازات >قفلت معاه والناس طابور وراي واخيرا عرف اني ماراح اعطيه شي
ختم جوازي بدون نفس وعطاني اياه وانا مبسوط اخذته ومشيت
وعلى سير العفش اخذت شنطتي ويالله طاب في الجمارك
ونفس الاسلوب جلس يفتش الشنطه بس اعطيته من اولها قلت ماراح ادفع لك شي ماعندي صرف 
طفشني شوي بس عرف انه ماراح ياخذ شي وقفل الشنطه وقال توكل على الله 
—————————-
طبعا انا رافض الدفع مو عن بخل والله بس حنا عودناهم على هالشي وصاروا يطفشون السائح الخليجي وياخرونه لحد مايدفع اما السائح الاجنبي اول مايوصل الكونتر يختم له في دقيقة 
وإلا 100 درهم ماتسوى لو نطلتها بوجهه ما اخرني ولا دقيقه 
وهذي مشكلة الدول العربية كل من تقابله يطلبك 
وكذلك قوة استغلال ونصب على الخليجيين ياكرهي للدول العربية ولو رحلتي مو ع الخطوط المغربية ماطبيت دوله عربية 
وكذلك قلت اقسم المسافه اريح في المغرب وبعدين اطلع ع البرازيل مايقارب 10 ساعات طيران مافيني حيل على الترانزيت

استاجرت سياره عن طريق موقع لشركة rentalcars وبعد الايجار والحجز الشركة تبحث عن مواصفات السيارة اللي طلبتها من شركات التاجير مثل سكست ويورب كار وغيرها من الشركات اللي لها عقود مع rentalcars وطبيت في شركة locationauto عطوني سيارة حتى المكيف يالله يطلع هواء ومن كل جهه مصدومه ورفضت استلمها قلت هذي مو السيارة اللي طلبتها
ياتعطني فيئه اعلى يانفس السيارة اللي استاجرتها 
حاولو يقنعوني ان هذي فيئتها اعلى بس رفضت اسلمها حتى جابو لي نفس السيارة وموديلها قديم 2010 بعد هواش ورفع الصوتولم شفت السيارة انصدمت قلت هذي ماتوديني الدار البيضاء مو مراكش واغادير 
قالوا هذي اللي انت طالبها قلت طيب ابي اغيرها فرفضوا بحجة ان ماعندهم إلا هالسيارتين والسالفة بس عناد لمن تهاوشت معهم ورفضت استلام السيارة الاولى والله انقهرت منهم ولو كنسلت بيروح علي مبلغ الايجار وفوق هذا اخروني مايقارب الساعة حتى غيروا العقد حق السيارة الاولى المهم طفشوني 
واول ما استلمت المفتاح كان فية ثلاثة اشخاص يعملون في كراج السيارات كنت اسولف معهم لحد ماغيروا العقد الاول واطلع محفظتي واعطي كل واحد 100درهم والاثنين اللي تهاوشت معهم ورفضوا يغيرون السيارة سحبت عليهم وكانت نظراتهم مليئة بالحقد بس قلت ابي اقهرهم وماراح اعطيهم شيء
استلمت سيارتي بعد دعوات طيبة من اللي عطيتهم فلوس ومسكت الطريق على مراكش

وصلت مراكش والحمد لله سكنت ليلة بفندق سمير اميس مراكش بمبلغ 593 شامل الافطار

منقول بتصرف